Ubuntu 26.10-ის რედაქციებს უამრავი ცვლილება მოაქვს

მთავარ გამოცემასთან ერთად, Ubuntu 26.10-მა საზოგადოებრივი რედაქციების ახალი ვერსიებიც წარმოადგინა, მათ შორის Kubuntu, Xubuntu და Ubuntu MATE-ის სასიხარულო დაბრუნება.

Ubuntu-ს ყველა ოფიციალური რედაქცია მთავარი გამოშვების მსგავს ბაზას იზიარებს: Linux 7.3 ბირთვს, Mesa 26.2 გრაფიკულ დრაივერებს, განახლებულ ხელსაწყოებს და Snap Store-იდან snap-პაკეტების ინსტალაციის მხარდაჭერას.

განაგრძეთ კითხვა Ubuntu-ს ყველაზე პოპულარული რედაქციების ძირითადი ცვლილებების გასაცნობად, აგრეთვე ჩამოსატვირთი ბმულებისთვის, თუკი მათი პირადად გამოცდა გსურთ.

Ubuntu 26.10-ის რედაქციების მიმოხილვა

Xubuntu 26.10

Xubuntu 26.10 გამოდის Xfce 4.20-ით, რომელმაც სტაბილურობის გასაუმჯობესებლად შეცდომების შესწორებები და Wayland-ის მზარდი მხარდაჭერა მიიღო („მათთვის, ვინც საკმარისად გაბედულია მის გამოსაყენებლად“, ხუმრობს გუნდი).

გამოსახულებების დასათვალიერებელმა პროგრამამ Ristretto მიიღო სურათების არევის ფუნქცია, გააუმჯობესა ბეჭდვა და შეუძლია სურათების გახსნა ვებბმულებიდან. Xfce Terminal-მა შეამცირა პროცესორის რესურსის მოხმარება და დაამატა URL-ების მონიშვნის გამორთვის პარამეტრი.

Screenshooter-ს, ეკრანის ანაბეჭდის სტანდარტულ ხელსაწყოს, უკვე შეუძლია Wayland-ზე კონკრეტული არეალისა და სრული ეკრანის ანაბეჭდების გადაღება, თუმცა მოეხსნა Imgur-ზე ატვირთვის ფუნქცია. Catfish-ის ძიება ამიერიდან აქტიურ საქაღალდეში იწყება. აპლიკაციების განახლებები გრაფიკული სამუშაოებისთვის GIMP 3.2.6-საც მოიცავს.

ცვლილებების შესახებ დამატებითი დეტალები იხილეთ Xubuntu 26.10-ის გამოშვების ოფიციალურ შენიშვნებში.

ჩამოტვირთეთ Xubuntu 26.10

Ubuntu Kylin 26.10

Ubuntu Kylin 26.10 ძირითადად შეცდომების გასწორებისა და პაკეტების განახლების გამოშვებაა, მომხმარებლისთვის თვალსაჩინო დიდი ცვლილებების გარეშე. Windows 7-ის სტილის UKUI სამუშაო მაგიდის გარემო ზუსტად იგივე ვერსიაა, რაც აპრილის 26.04 გამოშვებაში შედიოდა.

თუმცა, აქ დაგხვდებათ თვალისმომჭრელი (ხელოვნური ინტელექტის მიერ გენერირებული) სამუშაო მაგიდის ფონი. ის ახლებურად წარმოაჩენს Ubuntu-ს გამოშვების ოფიციალურ თილისმას1 (სკაროსს) დენად „glassmorphism“ სტილში, მოელვარე პასტელური ფერების გრადიენტებით.

Ubuntu Kylin 26.04-ის ფონიც ორიგინალურად ხსნიდა თილისმის ილუსტრაციას (აღსანიშნავია ზღვით გარშემორტყმული ენოტის ფორმის კუნძულის ფოტოსურათი, რომლის თავზეც თავდაყირა თოლიები დაფრინავდნენ), ასე რომ, იმედი მაქვს, ეს ახალ ტრადიციად დამკვიდრდება.

ჩამოტვირთეთ Ubuntu Kylin 26.10

Kubuntu 26.10

Kubuntu 26.10-ის გამოშვების ანონსში ნათქვამია, რომ ის გვთავაზობს „უახლეს KDE Plasma-ს2“. რეალურად მას თან ახლავს Plasma 6.7 და არა ახლახან გამოსული Plasma 6.8, თუმცა ეს მაინც ერთი ვერსიით ახალია Kubuntu 26.04-ში არსებულთან შედარებით.

მრავალი მონიტორის მქონე მომხმარებლებს უკვე შეუძლიათ ვირტუალური სამუშაო მაგიდები კონკრეტულ ეკრანებს მიაბან და მათ შორის კლავიატურის ახალი მალსახმობებით უფრო მარტივად გადაერთონ.

სხვა ცვლილებები მოიცავს თემებისა და მუქ რეჟიმზე გადართვის შეცდომების გასწორებას, სამუშაო მაგიდის შეტყობინებების სრიალის ეფექტს, სასაათო სარტყლის სხვაობის მანიშნებლებს Digital Clock ვიჯეტში და სამუშაო მაგიდაზე კრეფის პარალელურად ძიების ჩართვის ფუნქციას.

როგორც 26.04 გამოშვებაში, Plasma X11 სესია ნაგულისხმევად არ მოყვება, მაგრამ მისი ხელით დაყენება შესაძლებელია. ეს იქნება ბოლო გამოშვება, სადაც ამის გაკეთება მოხერხდება, რადგან Plasma 6.8-მა plasma-session-x11 სრულად ამოიღო.

ჩამოტვირთეთ Kubuntu 26.10

Ubuntu MATE 26.10

Ubuntu MATE დაბრუნდა თავისი 26.10 გამოშვებით, რაც პირველი რელიზია მისი ახალი შემნარჩუნებლების ხელმძღვანელობით. MATE-ის ყველა პაკეტი არ განახლებულა უახლეს ორიგინალ ვერსიამდე, თუმცა რაც შესულია, სტაბილურია და შეცდომების გასწორებებს შეიცავს.

ამ რედაქციამ მიმდინარე წლის დასაწყისში 26.04 LTS გამოტოვა. გამოშვების შენიშვნების თანახმად, ეს პირველი ვერსიაა, რომელიც Ubuntu-ს Dracut-ზე გადასვლას ითვალისწინებს. მან ასევე ამოიღო gdei და ifupdown ჩაანაცვლა netplan-ით.

ახალი გუნდის ხელში რედაქციის ფეხზე დაყენება ერთ ღამეში ვერ მოხდებოდა. მიუხედავად იმისა, რომ ამ გამოშვებაში საკმაოდ ბევრი „ცნობილი პრობლემაა“ ჩამოთვლილი (დაზიანებული RedShift, დაკარგული ხატულები, ვირტუალური მანქანების უცნაურობები), მისი დაბრუნება მაინც სასიხარულოა.

ჩამოტვირთეთ Ubuntu MATE 26.10

Lubuntu 26.10

Lubuntu 26.10 გამოდის LXQt 2.4.0 სამუშაო გარემოთი, რომელიც დეველოპერების მიერ აღწერილია, როგორც „ძირითადად შეცდომების გასწორება და კოდის გაწმენდა“, თუმცა აქვს მცირე გაუმჯობესებებიც, როგორიცაა ხმის აპლეტის ჰორიზონტალური განლაგება და ის, რომ დროებითი შეტყობინებები ეკრანზე ზედმეტად დიდხანს აღარ რჩება.

Lubuntu 26.10-ში ნაგულისხმევ სესიად კვლავ X11 რჩება, თუმცა სისტემაში შესვლის ეკრანიდან უკვე ხელმისაწვდომია Wayland-ის სესიაც, რომელიც Miriway-ზეა დაფუძნებული.

ჩამოტვირთეთ Lubuntu 26.10

Ubuntu Studio

Ubuntu Studio 26.10 კვლავ ემსახურება ნებისმიერი ტიპის შემოქმედებით ადამიანს, თუმცა მუსიკოსები აქ კიდევ უფრო მეტ აუდიოაპლიკაციას იპოვიან, მათ შორის Sonic Pi-ს ლაივ-კოდირების გარემოსა და SuperCollider-ს „ალგორითმული“ კომპოზიციებისთვის.

ასევე ხელმისაწვდომია ბრძანებათა სტრიქონის თეთრი ხმაურის გენერატორი jnoise. განახლდა მრავალი სხვა აუდიოინსტრუმენტი და მთელი რიგი სხვა პროგრამული უზრუნველყოფა, მათ შორის OBS Studio-ს, GIMP-ის, Ardour-ის, Krita-სა და Kdenlive-ის უახლესი ვერსიები.

Ubuntu Studio-ს ინსტალატორი უკვე იძლევა საშუალებას მეტა-პაკეტებიდან ცალკეული პაკეტები შეირჩეს, ხოლო რედაქციის აუდიოკონფიგურაციის ოსტატის სამომხმარებლო ინტერფეისი უფრო მოხერხებული და დახვეწილი გახდა.

ჩამოტვირთეთ Ubuntu Studio 26.10

სხვა ხელმისაწვდომი რედაქციებიც

Edubuntu 26.10 ადმინისტრატორებს საშუალებას აძლევს ინსტალაციისას აირჩიონ ინდივიდუალური პაკეტები ასაკობრივი ჯგუფების პროგრამული ნაკრებებიდან და ანახლებს თავის ახალი ამბების წამკითხველ Paperboy-ს, რომელიც საშუალო და უმაღლეს განათლებაში მედიაწიგნიერების გაკვეთილებისთვის გამოიყენება.

Ubuntu Budgie 26.10 ამატებს ახალ ვიჯეტს ინტერნეტ-რადიოსადგურების მოსაძებნად და დასაკრავად, ასევე მხარს უჭერს სამუშაო მაგიდის ფონის დღე/ღამის ავტომატურ რეჟიმს, ხოლო Ubuntu Cinnamon 26.10 თავის სამუშაო გარემოს Cinnamon 6.6.9 ვერსიამდე ანახლებს.

1. იგულისხმება ოფიციალური თილისმის ილუსტრაციიდან აღებული იგივე სკაროსის ფორმა. სხვა რედაქციებიც შეიცავს ფონებს სკაროსის გამოსახულებით, განსხვავებულ დიზაინსა და სტილში. ↩︎
2. https://web.archive.org/web/20261015225700/https://kubuntu.org/news/kubuntu-26-10-release-notes/ ↩︎